GRUNNLOVSFEIRING I DAG
Tysdag 25. mars markerer HVO 200-års-jubileet for den norske grunnlova. Datoen er slett ikkje vilkårleg vald, for 25. mars 1814 var ein viktig dag i Volda og andre lokalsamfunn på Sunnmøre. Det får vi høyre meir om i lunsjpausen i Berte Kanutte-kantina no på tysdag.
Høgskulelektor Harald Krøvel vil gje oss ei miniførelesing om kva som hende her i bygda for akkurat 200 år sidan. Det hadde absolutt med storpolitikken og grunnlovsarbeidet å gjere.
Folket rundt i landet skulle ha eit ord med i laget i 1814, og sidan då har lokaldemokratiet utvikla seg mykje. Dermed er det både naturleg og hyggeleg at ordførar Arild Iversen vert med på markeringa i høgskulekantina.
Kor-debut
For å skape ei høgtidleg så vel som festleg ramme har rektor teke initiativ til eit eige HVO-mannskor. Dugande fagfolk med kompetanse på både det eine og det andre har teke oppgåva på alvor og øvt inn eit repertoar for nettopp dette høvet.
Med den entusiastiske og myndige Ivar Hagen som dirigent er det all grunn til å sjå fram til debuten. Her vert det komprimert formidling av både kultur og kunnskap – i ein liten halvtime frå halv tolv på tysdag.
