«Impro for the palate»
Cocktail-mottakinga på International Research Seminar på Høgskulen i Volda tysdag var eit sanseleg eksperiment der den musikalske improvisasjonen sprang ut av smaken.
Professor og matforskar Anu Hopia frå universitetet i Turku i Finland og førsteamanuensis i naturfag og matkultur/helse Erik Fooladi (HVO).
«Impro for the palate» var tittelen på den originale mottakinga i regi av førsteamanuensis i naturfag og matkultur/helse Erik Fooladi (HVO) og professor og matforskar Anu Hopia frå universitetet i Turku i Finland.
Professor i musikk ved HVO Magnar Åm var blant musikarane som improviserte.
Det var eit multimodalt eksperiment der musikk og smak blei kontrastert. Ei gruppe musikarar, deriblant professor i musikk ved HVO Magnar Åm, fekk servert ein cocktail og skulle improvisere ut i frå den. Verken musikarane eller deltakarane på seminaret var klar over kva av dei tre smaksbasene søt, sur eller bitter dei blei servert. Deltakarane skulle så smake seg fram til kva for ein av dei tre cocktailane dei meinte harmonerte best med den improviserte musikken.
─ Når musikarar har blitt bedt om å improvisere basert på smaksopplevingar viser det seg ofte at somme musikalske særtrekk kjem meir fram enn andre. Til dømes blir søt smak ofte uttrykt legato, sa Hopia.
Fooladi og Hopia ville undersøke om musikarane og deltakarane på seminaret koplar dei same cocktailane og musikk-«satsane».
─ Det er ikkje openlyst kva smak og musikk som passar ilag, men det blir hevda at ein kan sjå mønster. Det er forsking som tyder på at vi gjer slike koplingar, men uklart korleis det føregår og i kva grad dei er kulturelt betinga, sa Fooladi.
Informasjon om kva smakar deltakarane kopla med kva sats blei så samla saman. Ei midlertidig og enkel analyse viste at for nokre av dei seks satsane var der lite eller ikkje noko samsvar mellom det musikarane smakte og den smaken publikum responderte med. Men for to av satsane svarte publikum tydeleg med same smak som musikarane. Er det kanskje slik at det er mulig å formidle smaksopplevingar gjennom musikk? Det som i alle fall er sikkert er at deltakarane fekk oppleve både gode og «interessante» smakar utvikla av finske kokkar og vinkelnerar, og dei fekk oppleve både fascinerande og vakker musikk frå dei eminente musikarane.
