Symfoniorkesteret og høgskulekoret med årets adventskonsert
Den tradisjonsrike adventskonserten som høgskulen kvart år arrangerer i Volda kyrkje, går av stabelen komande torsdag 3. des. kl. 19.00. Konserten får innslag ved eit eige brassband, studentsolistar og stor spennvidde i repertoaret, melder Henny Koppen ved musikkseksjonen.
Aktørane denne kvelden kjem alle frå musikkmiljøet ved høgskulen, fortel Koppen.
– Orkesteret og koret spelar ei sentral rolle, og vil presentere utdrag frå konserten dei hadde i kyrkjemusikkveka. I tillegg får vi høyre nyleg innøvd program, med fokus på jula.
– Også andre musikarar vil sleppe til denne kvelden, mellom anna eit eige brassband, der alle musikarane er tilsette eller studentar på høgskulen.
– Dette er også kvelden då ein del studentar får vist kva dei kan. I samarbeid med lærarar i hovudinstrument har fleire av studentane plukka ut nummer som dei presenterer i Volda kyrkje denne kvelden.
– I det heile blir det ein konsert som er prega av ungdommelege aktørar og stor spennvidde i repertoar, seier Koppen, og inviterer alle til å koma. Konserten er gratis.
