Felles innsats for miljøet – Studentsamskipnaden si kantine er no Miljøfyrtårn
Ein viktig milepåle for berekraft er nådd når studentar og tilsette no kan nytte seg av ei Miljøfyrtårn-sertifisert kantine i Berte Kanutte-huset på campus i Volda.
Miljøfyrtårn-gruppa ved Høgskulen i Volda er glade for å kunne vise fram ei Miljøfyrtårn-sertifisert kantine ved Høgskulen i Volda. Bak f.v.: Rune Aasen (adm. dir. i SiVolda), Sindre R. Tronstad (styreleiar i SiVolda), Geir Helge Nilsen (gruppa), Ann Kristin Emblem (høgskuledirektør), Svein Håvar Vatne (Miljøfyrtårn-ansvarleg), Solbjørg Nossen Leite (Miljøfyrtårn-ansvarleg), Mona Johnsen (gruppa), Elisabeth Welle (gruppa) og Jan Harald Eikenes (kantineleiar).
Etter at Høgskulen i Volda blei Miljøfyrtårn-sertifisert i 2018, har ein oppmoda om at kantina til Studentsamskipnaden i Volda (SiVolda) skulle følgje etter. I fjor fann kantina det mogleg å starte prosessen mot sertifisering, og gleda var stor då sertifiseringa var i boks.
Gjennom heile arbeidet har Høgskulen i Volda (HVO) støtta opp og delt av sine eigne erfaringar i sertifiseringsprosessen.
Grøn drift og berekraftige tiltak
Miljøfyrtårn-sertifiseringa stadfestar at kantina har fått på plass dokumentasjon på at berekraftige løysingar innan drift, ressursbruk og miljøpåverknad er på plass.
Med tiltak som redusert matsvinn og auka bruk av miljøvenlege materiale bidreg kantina til ein grønare kvardag for både studentar og tilsette.
Søppelsortering og vidare samarbeid
HVO og SiVolda deler ikkje berre lokale, men også eit sterkt engasjement for å skape ei meir berekraftig framtid.
I 2025 skal ein arbeide saman for å auke graden av søppelsortering, spesielt i området rundt kantina.
Eit anna tiltak er å vurdere å byte ut noko av papir- og pappservise med glas og porselen. Målet er å redusere avfallsmengda og auke graden av sortering.
Eit samla berekraftig fellesskap
Sertifiseringa er eit synleg bevis på at samarbeid og langsiktig innsats gir resultat.
– Vi er stolte over denne anerkjenninga og ser fram til å fortsetje arbeidet for miljøet i lag, seier direktør Rune Aasen i SiVolda og høgskuledirektør Ann Kristin Emblem ved HVO.
Sertifiseringa bidreg til å styrkje eit samla og langsiktig arbeid, der HVO og SiVolda jobbar saman for miljøet.
