Rangsæter er konstituert høgskuledirektør
Høgskulestyret har konstituert Oddrun Rangsæter som høgskuledirektør ved Høgskulen i Volda.
Oddrun Rangsæter. Foto: Silje Naranjo, UiO.
I eit omframt styremøte torsdag 27. mars 2025 konstituerte styret ved Høgskulen i Volda (HVO) Oddrun Rangsæter som høgskuledirektør ved HVO.
Rangsæter har språkfagleg bakgrunn, har arbeidd som leiar i universitets- og høgskulesektoren samanhengande sidan 1996 og har brei leiarerfaring.
Rangsæter er i dag fakultetsdirektør ved juridisk fakultet på Universitetet i Oslo.
Allereie 7. april byrjar Rangsæter å arbeide i 20 prosent stilling som høgskuledirektør ved HVO. Frå 1. mai 2025 er Rangsæter på plass i Volda i 100 prosent stilling. Som høgskuledirektør får Rangsæter ansvar for den samla administrative verksemda ved HVO.
– Eg er svært glad for at Rangsæter har takka ja til stillinga som høgskuledirektør, og vi ser fram til eit godt og fruktbart samarbeid for Høgskulen i Volda, seier rektor og styreleiar Odd Helge Mjellem Tonheim.
Rangsæter set pris på tilliten frå HVO-styret og gler seg til å ta fatt på arbeidsoppgåvene.
– Høgskulen i Volda har vore ein viktig og nyskapande utdanningsinstitusjon i Noreg heilt sidan slutten av 1800-talet. Eg gler meg til å få vere med og bidra til at Høgskulen i Volda skal kunne halde fram med å vere nettopp det, seier Rangsæter.
