Bli med på eit spennande leseforskingsprosjekt!
Er du nysgjerrig på korleis folk les, prosesserer og forstår tekst? No kan du delta i ein nettbasert studie om språkprosessering og leseåtferd.
Illustrasjonsfoto frå lesestudien.
Forskarar ved Institutt for språk og litteratur ved Høgskulen i Volda, under leiing av Hjalmar Eiksund og Jade Sandstedt, søkjer deltakarar til ein spennande nettbasert studie om språkprosessering og leseåtferd.
Kven kan delta?
Alle mellom 18 og 50 år som har sunnmørsdialekt og ikkje har lesevanskar, kan delta. Studien blir gjennomført på nettet, så du kan delta heimanfrå på din eigen datamaskin når det passar deg. Alt du treng, er ei stabil internett-tilkopling.
Studien går ut på å lese korte, enkle setningar. Studien er delt opp i to økter som kvar varer i 20–30 minutt. Desse øktene skal gjennomførast med minst ei vekes mellomrom. Når begge øktene er fullførte, får deltakarane eit digitalt GoGift-gåvekort på 200 kr som takk for deltakinga. Du kan delta her: http://www.tinyurl.com/Lesestudien.
Korleis fungerer lesing?
Lesing kan verke enkelt, men er eigentleg ein svært kompleks prosess der fleire delar av hjernen blir aktiverte og jobbar parallelt – frå å kjenne igjen ord visuelt til å tolke meining, hente fram kunnskap frå minnet og knyte alt dette saman til forståing.
– Vi prosesserer språk i abstrakte skrivne symbol med overraskande effektivitet, seier førsteamanuensis Jade Sandstedt.
– Vaksne les i snitt om lag 240 ord per minutt. Det betyr at dei ser, kjenner igjen, tolkar og integrerer eit nytt ord i ei setning på berre 250 millisekund i snitt.
Men forskarane forklarer at det er mykje vi framleis ikkje veit om korleis folk les, og korleis ulike faktorar påverkar leseåtferd. Faktorane kan vere aldring, språkbakgrunn, dialekt, utdanning og andre sosiodemografiske og nevrokognitive forskjellar.
Med denne studien håpar forskarane å kaste meir lys over korleis folk prosesserer tekst, ord for ord, og korleis dette varierer mellom ulike lesarar.
Bli med på ein lett og interessant studie
I denne studien vil deltakarane lese korte, enkle setningar som blir viste eitt ord om gongen. Du styrer lesehastigheita sjølv ved å trykkje på mellomromstasten for å gå vidare til neste ord.
– Her er vi ikkje interesserte i kor raskt nokon kan lese, men heller i korleis leseåtferda varierer frå person til person, forklarer førsteamanuensis Hjalmar Eiksund.
– Det viktigaste er å lese på ein måte som er komfortabel for deg, og konsentrere seg om å forstå kvar setning.
Korleis delta?
Du kan bli med i studien når det passar deg ved å trykkje på denne lenkja: http://www.tinyurl.com/Lesestudien.
– Vi er svært spente på denne studien, seier Jade Sandstedt.
– Nettbaserte leseverktøy gir oss moglegheita til å inkludere ei mykje breiare gruppe deltakarar enn vi kunne med tradisjonell testing på høgskulen. Vi håpar at desse metodane gjer funna våre meir inkluderande og representative.
Prosjektet er planlagt å gå føre seg til 1. august 2025. Har du spørsmål om studien, kan du gjerne ta kontakt med forskingsleiarane Jade Sandstedt (jade.jorgen.sandstedt@hivolda.no) og Hjalmar Eiksund (hjalmar.eiksund@hivolda.no).
