I emnet skal studentane vidareutvikle sin kompetanse innan sentrale område for barnevernspedagogar:

Samarbeids- og relasjonskompetanse er sentralt for barnevernspedagogar, og det er difor lagt vekt på at praksis skal gi erfaring med å etablere kontakt, byggje relasjonar og kommunisere med og rettleie barn, unge og føresette. Mange menneske i barnevernspedagogen sine målgrupper lever utsette liv, og blant desse er barna dei mest sårbare. For å ivareta rettstryggleiken, må barnevernspedagogen ha evne til å ta barn sitt perspektiv, og sjå på og behandle barn som skapande subjekt, som skal ha innverknad på eigne liv.

I yrkesutøvinga vil barnevernspedagogen stå overfor komplekse situasjonar der det kan vere utfordrande å ta avgjersler. Ein legg derfor vekt på at studenten skal ta i bruk analytiske ferdigheiter, kritisk og etisk refleksjon for å styrke vurderings- og avgjerdskompetansen i ein systematisk og kunnskapsbasert praksis. Studenten skal dermed få erfaring med å undersøke, analysere, vurdere, avgjere, planleggje og evaluere i samarbeid med barn, unge og familiar. Ein naturleg del av dette er at studenten skal kunne bruke dei digitale verktøya ved praksisplassen.

Barnevernspedagogen må kunne samarbeide med andre hjelpeinstansar til barnets beste. Gjennom praksis skal studentane derfor arbeide tverrprofesjonelt og utveksle faglege synspunkt og erfaringar med andre profesjonar og hjelpeinstansar til det beste for barn, unge og familiane deira.

Internasjonal utveksling kan bidra til utvikling av kunnskap om andre kulturar, mangfald, fattigdom og bakgrunn for migrasjon. Det blir difor lagt til rette for utlandspraksis, som kan gi studentane erfaring med å stå i minoritetsposisjonar, og vere grunnlag for utvikling av global forståing og kultursensitivitet.