Engelsk for akademiske formål for HVO-tilsette er eit 5 studiepoengs emne som kan takast som del av eit meir omfattande løp - innan HPE - eller som eit enkeltståande emne. Studiet skal skape ein utviklingsprosess i den einskilde studenten sin evne til å kommunisere effektivt og formålstenleg på engelsk i akademiske samanhengar, skriftleg og munnleg. Dette skal skje gjennom undervisning om engelsk akademisk skriving/presentasjon, gjennomgang av eksempeltekstar og gjennom produksjon av eigne skriftlege og munnlege tekstar til framføring. I tillegg vil ein lære gjennom lesing av pensumlitteratur og gjennom lesing, refleksjon over og diskusjon av eigne og medstudentars tekstar.

Emnet er organisert i to hovuddeler: del ein fokuserer på vanlege utfordringar hjå engelskbrukarar i norsk akademia, med særleg vekt på skriftleg engelsk, og vil også omfatte ei diagnostisering av spesifikke styrkar og utviklingsrom hjå den einskilde studenten. Del to vil i større grad fokusere på munnleg bruk av engelsk, og set også språkbruken inn i ein kulturell samanheng. Denne delen kan leie fram til ei samling ved Det norske studiesenteret i Storbritannia, York, med undervisning der.

Til kvar av dei to delane vil det vere knytt eitt arbeidskrav: ein skriftleg tekst tilpassa einskildstudenten si profesjonelle rolle knytt til del ein (med to gongar innlevering), og ein munnleg presentasjon knytt til del to. Til saman vil desse arbeidskrava utgjere ei eksamensmappe som vil bli vurdert til stått/ikkje stått. Studenten vil få rettleiing undervegs i arbeidet med begge arbeidskrava.