God leiing er viktig for å kunne utvikle barnehagen og sikre høg kvalitet i tilbodet. Styrarutdanninga er eit hjelpemiddel for å nå desse måla. Studentane skal utvikle seg som leiarar gjennom kritisk innsikt i eiga yrkesrolle og  eigen praksis. Dei skal utvikle auka innsikt og forståing for barnehagen sitt formål og samfunnsmandat, og styrke eigen kompetanse og innsikt i høve til rammevilkår, verkemiddel og arbeidsformer. Studiet skal gi studentane utvida reiskapar for refleksjon over eiga rolle og medvit omkring korleis verdiar og haldningar påverkar denne. Eit gjennomgåande tema er difor utvikling av eigen identitet som leiar.

I løpet av studiet skal studentane utvikle kunnskap og ferdigheiter i å skape resultat gjennom arbeid på individ -gruppe -organisasjons og -samfunnsnivå. Studentane får gjennom studiet inngåande kunnskap om endringsstrategiar i barnehagen og skal kunne utøve dynamisk og målretta leiing både av det pedagogiske arbeidet i barnehagen, av personalet og av barnehagen som organisasjon, og gjennom dette kunne skape resultat gjennom andre.

Gjennom studiet skal studentane styrke grunnlaget for å omsetje ulike styringssignal til reflektert praksis. Studentane skal få innsikt i juridiske spørsmål som er relevante for barnehagefeltet og få kunnskap om konsekvensar for leiaransvar i eit mangfaldig samfunn.

Innhald i studiet:

Studiet er organisert rundt følgjande tema:

Barnehagen som organisasjon i samfunnet

Styring og administrasjon

Generelle leiingsteoriar og pedagogisk leiing 

Barnehageleiar som arbeidsgjevar og relasjonsbyggar

Utvikling og endring i barnehagen