Urban Dahllöf, 1928-2014
Professor Urban Dahllöf døydde 28. august. Han var ein av dei mest markante svenske pedagogane frå 1960-talet og utover som professor først i Gøteborg, seinare i Uppsala. Han vart i 1990-åra også ein svært viktig fagperson og kollega for mange ved Høgskulen i Volda og Møreforsking.
Han var i lag med Ulf Lundgren hovudarkitekt bak den såkalla Rammefaktor-teorien, som fekk stor innverknad både i og utanfor Sverige for å studere prosessar i klasserom og skule i lys av statleg styring.
Urban Dahllöf.
Urban Dahllöf vart i 1990-åra også ein svært viktig fagperson og kollega for mange ved Høgskulen i Volda og Møreforsking. Han vart først engasjert i 1991 av dåverande Universitetet i Trondheim for å rettleie doktorgrads-stipendiatar i eit nyoppretta doktorgradsprosjekt mellom universitetet og Volda-miljøet. Han vart dermed ein hyppig gjest i Volda frå hausten 1991 for å rettleie sine kandidatar. Hans store faglege ressursar og hans inspirerande og inviterande veremåte førte til at han etter kvart fekk eit stort fagleg nettverk i høgskulemiljøet her. Han vart svært glad i Volda, og vart etter kvart også tilsett som professor II her, ei stilling han sat i fram mot slutten av 90-talet.
Urban leverte ein stor og viktig innsats for den faglege utviklinga av høgskulemiljøet i Volda. Kollegaer her gav på 70-årsdagen hans i 1998 ut boka «I lærande fellesskap» inspirert av hans faglege innsats. Fred over minnet!
Kåre Heggen
