Lærarstudentane berga undervisninga
10 lærarar vart sjukmeldte på ein gong. Då tok lærarstudentane frå Høgskulen i Volda over på Hornindal skule. – Dei har vore superflinke, seier rektor ved skulen til avisa Fjordingen.
Kvart år har grunnskulelærarstudentane ved Høgskulen i Volda såkalla skuleovertaking som ein del av praksisen sin. Då tek dei over alle rollene på ein skule, og fungerer som alt frå rektor til kontaktlærarar. I år var Hornindal ein av skulane studentane skulle få «låne». Timingen viste seg å vere meir enn god: 10 lærarar vart nemleg sjukmelde på ein gong, skriv Fjordingen.
- Nokre gonger har ein flaks, seier rektor Gro Mikalsen til avisa. Ho skryt av innsatsen til lærarstudentane i intervjuet: - Dei har vore superflinke. Eg er imponert!
Studentane sjølve fortel om lærerike og utruleg kjekke dagar: – Vi har nok fått øvd oss litt utover dei rammene som er vanleg grunna stort sjukefråvær, men det har gått veldig bra. Skuleovertaking er eit høgdepunkt i utdanninga, så dette har vi vore budd på, seier Aurora Dimmen Bratli, som saman med Anders Tomren var leiarar ved skulen under skuleovertakinga.
Les heile saka i Fjordingen, Møre-Nytt eller Sunnmørsposten (for abonnentar). Foto med løyve frå Roger Oldeide i Fjordingen.
- Lurer du på om du vil bli lærar? Les meir om lærarutdanningane vi tilbyr ved Høgskulen i Volda.