Panelsamtale om kunstig intelligens og programmering i skulen
Måndag 10. mars kan alle interesserte få med seg ein open paneldebatt om programmering og kunstig intelligens i skulen under ein konferanse høgskulen arrangerer i Ørsta.
10.–11. mars arrangerer Høgskulen i Volda (HVO) den årlege konferansen til programmeringsnettverket for realfag i skulen (PRIS).
Som del av konferansen skal det gjennomførast ein panelsamtale, og denne er open for publikum. Både lærarar, lærarutdannarar, foreldre, forskarar og andre interesserte er hjarteleg velkomne til å få med seg samtalen på Havila Hotel Ivar Aasen måndag 10. mars kl. 16.00 (gratis inngang).
Desse spørsmåla blir utgangspunktet for panelsamtalen:
- Kvifor er programmering ein del av matematikkfaget?
- Kva må elevar lære om kunstig intelligens (KI)?
Panelet består av
- Martyna Katarzyna Fojcik, stipendiat ved Høgskulen i Volda
- Morten Munthe, postdoktor ved Universitet i Bergen
- Bjørn Endre Helgesen, ansvarleg for Newton-rom i Ålesund kommune
- Andreas Brandsæter, førsteamanuensis ved Høgskulen i Volda
Panelsamtalen blir leia av Heidi Fagna, høgskulelektor ved Høgskulen i Volda.
Konferanse som viktig møteplass
Førsteamanuensis Runar Lie Berge og førsteamanuensis Andreas Brandsæter frå HVO er mellom arrangørane og fortel at dei gler seg til å arrangere PRIS-konferansen 2025.
Dette er det tredje året konferansen blir arrangert, og PRIS-konferansen har allereie blitt ein viktig møteplass for forskarar og lærarar med interesse for programmering i skulen.
