Unik praksiserfaring i Afrika og Asia
Å hjelpe rusavhengige, foreldrelause barn og trengande eldre i land som Tanzania og India har vore ein del av prakiskvardagen til barnevernspedagog- og sosionom-studentar dette semesteret.
Snorre Vegard Howlid og Maria Kvamvold hadde sin klientpraksis på barneheimen Arap Moi Childrens Home i Nakuru, nord i Kenya.
Å hjelpe rusavhengige, foreldrelause barn og trengande eldre i land som Tanzania og India har vore ein del av prakiskvardagen til barnevernspedagog- og sosionom-studentar dette semesteret.
Klientretta praksisstudium er obligatorisk i sosialarbeidarstudia, som gjeld bachelorgradene Sosialt arbeid, barnevernspedagog og Sosialt arbeid, sosionom. I haustsemesteret har 107 studentar vore i praksis i Noreg og i utlandet.
Rekordmange til utlandet
Høgskulen i Volda har i mange år vore sterke på internasjonalisering, mellom anna ved å ha studentgrupper i praksisstudiar i utlandet. I år valde 37 av 107 studentar å ha praksisen sin i utlandet. Studentane vart fordelt slik: Tanzania 17, India 14, Hellas 5, Kenya 4 og Irland 1. Dei har arbeidd med og fått unik praksiserfaring i sosialt arbeid ved barneheimar, skular for funksjonshindra, rusinstitusjonar, samfunnsarbeid og arbeid med eldre. Aldri før har så mange vald å ha praksis i utlandet.
I Norge kan Høgskulen i Volda plassere sosialarbeidarstudentar i Møre og Romsdal og Buskerud. Om lag 70 studentar er i Møre og Romsdal og 10 studentar i Buskerud. I Noreg har studentane praksis i felt som barnevernet, barneverninstitusjonar, rus og psykisk helsearbeid, bu og habilitering, krisesenter, skular, NAV, arbeid og inkluderingsbedrifter for å nemne nokre. I løpet av oktober fekk alle studentar besøk av kontaktlærar frå høgskulen, slik får både student og praksisrettleiar oppfølging, og tilsette får innsyn i trendar og utvikling i praksisfeltet.
Lærerik praksis
Studentane skal gjennom direkte kontakt med yrkesfeltet og brukarar av sosialfaglege tenester vidareutvikle sin kompetanse innan yrkesutøving som sosialarbeidarar. Dei skal relatere teoretiske kunnskapar frå studiet til praktisk sosialt arbeid. Gjennom refleksjon og analyse skal studentane sjå samanheng mellom situasjonar, rammer og arbeidsmåtar i sosialt arbeid. Studentar melder at dei ser praksisstudia som sentrale i studiet.
Praksisstudentar i utlandet har særlege utfordringar i ny og ukjend kultur. Dei fortel om gode og lærerike opplevingar, men også om store utfordringar og sterke kjensler. Vi presenterer her bilde frå studentar i utlandet.
Jonas Jacobsen Eliesen og Annabel Kjerpeseth Sunde hadde sin klientpraksis på Detroit Sober House på Zanzibar. Dette er også ein rusinstitusjon for menn, som jobbar etter Minnesotamodellen. Studentane blir her utfordra på å leie gruppesesjonar, ta opp spesielle tema til gruppesamtalar, samt ha individuell oppfølging av klientar.
På Kilimanjaro Center hadde Eileen Hjelme Connor og Silje Senning sin klientpraksis. Her jobba dei miljøterapeutisk med barna som bor på senteret og med ulike sosiale utfordringar i senteret sitt nærområde. Eileen og Silje brukte mellom anna sang, musikk og dans for å skape aktivitetar og læring hos barna.
Voldastudentane Snorre Vegard Hovlid (f.v.), Maria Kvamvold, Nina Leite og Malin Myrvang Haugen saman med lokale sosialarbeidarar ved Arap Moi Childrens Home, Kenya.
Studentane har også litt fritid til å utforske og gjere seg litt kjende i eit nytt land. Her frå ein nydeleg solnedgang ved ei strand i India.
14 Volda-studentar valde å reise til India og fekk oppleve eit samfunn heilt ulikt det ein er vand med heime i Noreg.
Studentane som reiser til same stad knyt spesielle band mellom seg. Her er nokre samla framfor eit tempel i India.
Studentane får besøk av tilsette frå Høgskulen i Volda. Her representert ved Lene Hovde og Gerd Skjong (fram til venstre).
