Barnevernspedagogstudiet passar for deg som ønskjer å jobbe med barn, unge og deira familiar, og som samtidig er oppteken av samfunnsspørsmål og sosiale problem. Studiet gir deg kunnskap om korleis desse gruppene gjennom systematisk barnevernsfagleg arbeid kan hjelpast til å meistre ulike livsutfordringar på deira arena. Dette gjer barnevernspedagogen gjennom å analysere og vurdere samspelet mellom barn, familie og omgivnadar og setje i verk utviklingsfremmande tiltak på førebyggande og intervenerande nivå. Gjennom studieprogrammet skal studentane oppleve danning og utvikling av yrkesidentitet. Fullført studium kvalifiserer også for opptak på relevante mastergradsprogram. 

Barnevernspedagogutdanninga har følgjande kompetanseområde:
Barn, unge og familiar
Dei fleste barn og unge veks opp i familiar. Å kjenne til ulike familiestrukturar, kjenneteikn ved barndom og utvikling, sosialisering og danning, men også problemstillingar knytt til normalitet, er derfor sentralt. Til dømes krev minoritetsperspektivet, herunder urfolks- og migrasjonsperspektiva, sensitivitet og ei opa og undersøkande innstilling til menneske med ulike sosiale identitetar og levesett. Barnevernspedagogen må derfor ha ferdigheiter i å kartlegge nettverk og identifisere ressursar, og eit syn på barn, unge og familiar som aktørar. Samtidig er det sentralt å kunne forstå korleis prosessar i samfunnet fører til at barn og familiar lever i risiko for marginalisering og ekskludering. Ein må kunne identifisere kjennteikn på ulike former for omsorgssvikt, funksjonsnedsetting og utviklingsforstyrring, og kva tiltak som kan vere til hjelp. Studiet legg derfor vekt på at studentane blir i stand til å reflektere kritisk over korleis barn og familiar har det i samfunnet, korleis deira livsvilkår kan beskyttast, og korleis barnevernspedagogen kan bidra til at deira stemmer blir høyrde også på samfunnsnivå.

Personleg kompetanse, samarbeids- og relasjonskompetanse
Å arbeide som barnevernspedagog vil seie å gi omsorg, formidle tenester og forsvare rettane til menneske med behov for hjelp, samtidig som rolla inneber å utøve sosial kontroll. Barnevernspedagogen sin personlege kunnskap, eigenskapar, haldningar og ferdigheiter utgjer derfor ein sentral del av barnevernspedagogen si profesjonsutøving. I utdanninga blir det lagt til rette for trening i å undersøke, lytte til og forsøke å forstå menneske sine ulike livssituasjonar i møte med hjelpeapparatet, og å ta med seg denne kunnskapen i eiga fagutvikling.

Forvaltningskompetanse
Barnevernsfagleg arbeid inneber å gi velferdstenester til barn og deira familiar. Tenestene utførast ofte i kommunalt og statleg barnevern, som barnevernstenester og barnevernsinstitusjonar, og kan innebere miljøterapeutisk arbeid, saksbehandling, å gi råd og rettleiing, økonomisk støtte eller gjere vedtak om avlasting og omsorgsovertaking. Det er viktig med kvalifiserte avgjerder, og i saker som gjeld omsorgsovertaking er det spesielt avgjerande med høg kvalitet og legitimitet. For å kunne ta vare på rettstryggleiken, må barnevernspedagogen ha kunnskap om dei strukturelle vilkåra for profesjonsutøvinga, herunder om velferdsstat, lover og rettar. Skriftlege kunnskapar og øving i å dokumentere og drøfte kunnskap og faglege, juridiske og etiske vurderingar er sentralt i studiet.

Analytisk kompetanse
Å ha analytisk kompetanse, å kunne gjere vurderingar og ta gode avgjerder, er nødvendig for godt barnevernsfagleg arbeid. Barnevernspedagogen skal arbeide systematisk og gjennom verksame arbeidsmåtar og metoder. Ein skal arbeide kunnskapsbasert gjennom å ta i bruk oppdatert forskings- og teoretisk kunnskap, brukarkunnskap og erfaringsbasert kunnskap i yrkeskonteksten. Samtidig møter barnevernspedagogen i si yrkesutøving komplekse situasjonar der kva som er verksam hjelp ikkje alltid er like tydeleg, og der det kan vere utfordrande å ta avgjerder. Utdanninga legg derfor opp til øvingar der studentane kan utvikle sine evner i etisk og kritisk refleksjon over forsking og praksis. 

Tverrprofesjonell samhandlingskompetanse 
Samarbeid på tvers av profesjonar og etatar er svært sentralt i barnevernsfagleg arbeid. Barnevernspedagogen må også kunne samarbeide med andre hjelpeinstansar til barnets og familiens beste. Barnevernspedagogen må ha kunnskap om andre tenester som det er nødvendig å samarbeide med for å betre situasjonen til barnet og/eller familien, og utvikle kompetanse i tverrprofesjonell samhandling. Delar av studiet er integrert med sosionomstudiet, og gir studentane øving i tverrprofesjonell samarbeidslæring.

Kunnskap om og kompetanse på desse områda vil bidra til å bygge den handlingskompetente barnevernspedagogen, som kan etablere og handtere relasjonar til barn, unge og deira familiar, og bidra til varig endring for utsette grupper.