Ved Høgskulen i Volda tilbyr vi ei rekke emne for vidareutdanning av lærarar innan matematikk. Desse emna er for deg som vil ha fagleg påfyll innanfor enkelte tema, eller deg som ønskjer ei fagspesialisering i matematikk med 60 studiepoeng. Dette kan til dømes legge grunnlaget for ei erfaringsbasert masteroppgåve i matematikkdidaktikk.

Vi legg opp til at du skal kunne ta alle emna som deltidsstudent og kvart emne er på 5 studiepoeng. Du vel sjølv kor mange emne du ønskjer å ta per semester; om det er eitt, to eller tre.

Undervisingsorganisering:

Studieprogrammet inneheld ei blanding av emne som er reine nettbaserte emne og emne som er samlingsbaserte. Sjå emneplanane for detaljar. Du får tilgang til eit eige digitalt klasserom der program for samlingar og førelesingar vert lagt ut. Det digitale klasserommet vert også brukt til oppgåveinnlevering og kommunikasjon med faglærar og medstudentar. Les om vurderingsordningar og eksamen i emneplanane.

Studiemodell: 

Tabellen nedanfor gir ei oversikt over når alle emna blir tilbydd. Kvart emne går annakvart år, så eit emne som går haust 25 vil neste gang gå haust 27. Dei fleste emna vil du kunne ta uavhengig av kvarandre, men dersom eit emne krev forkunnskapar vert det spesifisert i emneplanen.