Med påhalden penn?
Måndag 16. juni, kl. 14.15, vert det arrangert eit seminar ved HVO i samband med lanseringa av ei artikkelsamling som tek føre seg 1814 frå ein lokal og regional ståstad.
I kva grad deltok allmugen i 1814? Var folket aktive aktørar i 1814, eller bidrog dei med 
«påhalden penn», som er omgrepet som blir nytta om nokon som skriv under for andre? Og, korleis prega dei politiske hendingane gjennom dette året periferien, områda utanfor det sentrale Austlandet, og vice versa? Dette er spørsmål som forfattarane av artikkelsamlinga Med påhalden penn? 1814 sett frå Nordvestlandet og Telemark har forsøkt å svare på. Med utgangspunkt i Telemark og Nordvestlandet (Møre og Romsdal og Sogn og Fjordane) drøftar tolv forfattarar hendingane i 1814 på lokalt og regionalt nivå.
Boka er eit resultat av eit samarbeidsprosjekt mellom Høgskulen i Telemark, Høgskulen i Volda og Høgskulen i Sogn og Fjordane. Boka er redigert av Oddmund Løkensgard Hoel (HSF), Jens Johan Hyvik (HIT) og Harald Krøvel (HVO).
Under lanseringa vil Harald Krøvel først leggje fram nokre hovudresultat av prosjektet, før to av forfattarane gjev ein presentasjon av sitt arbeid med tematikken.
Tidspunkt: Måndag 16. juni, kl. 14.15
Stad: BK159 (vesle auditoriet)
Program:
14.15: Harald Krøvel: Med påhalden penn? 1814 sett frå Nordvestlandet og Telemark
14.45: Jon Tvinnereim Kongetruskap og patriotisme i Nordfjord og på Sunnmøre
15.15: Oddbjørn Melle. Demokrati-synergi:’Folkesouverænitets-principet’ møter den ‘låge danninga’.
Seminaret vert arrangert i samarbeid med Historisk foreining (Hifo) – Nordvestlandet.
