Emnet skal gi ei innføring og eit oversyn over arealplanlegging etter plan- og bygningsloven på kommunalt og regionalt nivå, og ei innføring i GIS både teoretisk og metodisk med fokus på GIS som planverktøy. 

Emnet skal etablere ei forståing for plan- og bygningsloven som planverktøy, og knyte dette til praktisk arealplanlegging. Sentralt i emnet er ei fordjuping i arealplansystemet med plantypar, planprosess, medverknad, generelle utgreiingskrav og føringar for arealplanlegging. Emnet tek føre seg sentrale arealplandokument; Planprogram, planomtale, føresegner og plankart med arealføremål. Planleggaren si rolle vert diskutert. Emnet vil også gi ei innføring i rettsverknaden av arealplanar. 

Studentane skal presenterast for dei moglegheitene og utfordringane GIS som planverktøy representerer. GIS-undervisninga vil bli organisert rundt praktiske øvingar, der studentane får metodisk erfaring med enkel bruk av GIS. 

Emnet vil i størst mogleg grad bruke konkrete arealplanar og arealplanprosessar i undervisninga, og på den måten vere praksisnært. Emnet gir ein god basis for dei som skal arbeide (og samarbeide) i kommunal sektor med planfaglege oppgåver, og for dei som ynskjer å gå vidare i eit planorientert studium.