Emnet Endringsleiing og utviklingsarbeid skal legge grunnlag for at studentane utviklar kompetanse for leiing av utviklingsarbeid i barnehagen. I tråd med føringar i rammeplan for barnehagen skal studenten planlegge eit utviklingsarbeid tilpassa barnegruppa sine erfaringar, interesser, synspunkt og initiativ. Eit mangfaldsperspektiv skal styre studenten sine val, planar og leiing av utviklingsarbeidet. Utviklingsarbeidet skal gjennomførast i emne 2, Barnehagelæraren som leiar av utviklingsarbeid.

Emnet er profesjonsretta og gir studenten teoretisk og empirisk grunnlag som støtte for arbeidet med kvalitetsutvikling i barnehagen.  Profesjonsforsking dannar grunnlag for refleksjon og utfordring av eigen profesjonsutøving og av kollektiv praksis. For å utvikle barnehagekvalitet, legg emnet vekt på kritisk analyse og diskusjon av vurderingsmåtar, dokumentasjonar og implementering av intensjonane i politiske styringsdokument. I emnet studerer studenten kva som kjenneteiknar ein lærande organisasjon og korleis den kan utviklast gjennom samskapt læring. I eit utviklingsperspektiv er målsetjinga å utvikle innsikt og fagleg skjønn som grunnlag for å leie, vurdere og dokumentere arbeidet med kompetansebygging for personalgruppa. Emnet nyttar varierte arbeidsformer og bygger vidare på barnehagelærarane sin kompetanse.