Opa førelesing med Lars Tuastad
I samband med masteremnet «Å skape meining», eit emne i mastergraden «Helse- og sosialfag – meistring og myndiggjering», blir det ei opa førelesing onsdag 6. november med musikkterapeut og doktorstipendiat ved Griegakademiet Lars Tuastad. Dagen før held han konsert på Rokken med bandet «Me and THE BAND`its».
Musikkterapeut Lars Tuastad vil presentere doktorgradsarbeidet sitt i rom 104 i Kaarstad-huset onsdag 6. november kl. 10.00 – 11.30.
Konsert på Rokken tysdag
«Me and THE BAND`its» er eit band som Lars Tuastad starta med innsette i Bergen fengsel. Dei har halde fram med å spele og skape musikk og tekstar etter at dei kom ut igjen i samfunnet. Tuastad er bassist i bandet, samtidig som han arbeider med doktoravhandling om prosjektet. Konserten blir tysdag 5. november kl. 19.00 studenthuset Rokken.
Spelte seg ut av fengselet
Medlemmene i «Me and THE BAND’its» begynte i spele saman medan dei var innsette, og har halde fram som band også utanfor murane. Musikken vart ein viktig del av tilbakeføringa til samfunnet.
I tillegg til Tuastad er bandet samansett av låtskrivar Kjell Andreasson på vokal og akustisk gitar, Sigurd Ekenes på elektrisk gitar og Geir Akse på trommer.
NRK
I februar 2012 viste NRK eit program om «Me and THE BAND`its». I den svært gripande dokumentaren «Blodige tårer» vart sjåarane kjende med frontfiguren «Kjellemann». Kjellemann er den fødde historieforteljar, noko som kjem tydeleg fram i dei sjølvbiografiske songane han lagar. Han kan kunsten å «fange» ei forsamling og har i eiga evne til å snakke rett inn i hjartet til folk.
Det er fri inngang for alle musikkstudentane ved Høgskulen i Volda, for studentane på masterstudiet og studentane på sosialfag.
