Mia Berner gjestar HVO: Erotikk, filosofi og skjønnlitteratur
Måndag den 14.11. gjestar Mia Berner HVO, og snakkar om boka "Fordi det er slik jeg ror," som kom ut i fjor haust. Det er ei skjønnlitterær bok, der temaet er kjærleik - forteljingar om erotiske møte, ein slags erotisk road-movie.
Forfattaren Mia Berner (f. 1923) har ein mangfaldig og interessant bakgrunn. Ho er fødd i Stavanger, vart 19 år gammal student og snart også forskingsassistent hos Arne Næss i Oslo, til okkupasjonen førte henne i svensk eksil. Der slo ho seg til som universitetslærar i sosiologi.
Ho har skrive ei lang rekkje vitskaplege artiklar innanfor fleire fag: Filosofi, sosiologi og psykologi. I tillegg har ho ein stor skjønnlitterær produksjon. Mest kjend er den biografiske romanen PS. Anteckningar från ett sorgeår (1985), der ho skriv om samlivet med den finske poeten Pentti Sarikoski. Etter det skreiv ho tre sjølvbiografiske romanar - Galjonsfigurer, Makrillgarn og Österut (1987- 90).
Utover nittitalet tok ho til å orientere seg meir og meir mot Noreg, og vart ein kjend og markant figur på litterære seminar her til lands. Og i det nye hundreåret har ho flytta tilbake til Noreg. Ho bur i Oslo og skriv skjønnlitteratur, og er ein markant kultur- og samfunnskritikar.
Måndag er ho gjest hos Ivar Aasen-instituttet, og fortel om bøkene sine og livet sitt i samtale med Nora Simonhjell og Stephen J. Walton.
Rom: Vesle auditorium Berte Kanutte-huset
Tid: Kl. 10.00-12.00
Vel møtt !
