Forsking og utvikling

I samarbeid med Noregs forskningsråd arrangerer Høgskulen i Volda den 17. og 18. oktober eit inspirasjonsseminar for kvinnlege tilsette/forskarar og studentar for auka verdiskaping i vårt distrikt. -Vi vil gi inspirasjon, ideutvikling og konkretisering av kommersialiserbar kunnskap og forsking, med mål om å mobilisere kvinner til å skape nye arbeidsplassar, seier Bjørn Gunnar Tafjord, prosjektleiar for forskningsprogramet FORNY.

Tor-Johan Ekeland og Kåre Heggen frå Høgskulen i Volda er redaktørane bak den nye læreboka ”Meistring og myndiggjering. Reform eller retorikk?” Fleire av fagpersonane ved Avdeling for samfunnsfag og historie som er knytt til mastergradsutdanninga har vore sentrale i arbeidet med boka.

Ingjerd Traavik, høgskulelektor i norsk ved Høgskulen i Volda, har skreve bok om biletanalyse basert på biletbøker av Fam Ekman. Boka er primært retta mot allmenn- og førskulelærarar, men ifølgje forlaget vil også foreldre og andre som har glede av biletbøker ha utbytte av boka.Traavik gir lesarane tilgang til eit lenge etterspurt begrepsapparat omkring biletbøker.

Førsteamanuensis Birger Løvlie har fått tilbod om å delta i programmet Northern Scholars ved University of Edinburgh i studieåret 2007/2008. Programmet skal stimulere forskingssamarbeid mellom høgskular og universitet i Noreg, Sverige, Danmark, Finland og Island på område der desse landa har felles interesser med Skottland.

Høgskulelektor Lila Marie Moberg ved Høgskulen i Volda er saman med Nora Lindén tildelt Nynorsk fagbokpris 2007 for bokprosjektet ”Barn og kommunikasjon – om små barns bruk av utforsking av digitale verktøy.” Juryen peikar mellom anna på nytenkinga i prosjektet – ”dette finst ikkje i litteraturen frå før.” Prisen vert delt ut under haustlanseringen til Det Norske Samlaget i dag, 15.8.2007.

Førstelektor Asbjørn Simonnes og tidlegare undervisningsleiar ved medieutdanninga i Volda, Gudmund Gjelsten har ført i pennen Fagbokforlaget si lærebok ”Skole og media.” - Vi stiller spørsmålet om korleis verdidualismen i media utviklar identiteten og karakteren til unge, og opnar for at større fokus på mellommenneskeleg kommunikasjon er viktig når ein lærer å bruke media.

Professor Kåre Heggen og førstelektor Lars Jørgen Vik ved Høgskulen i Volda har lagt fram rapporten Rekruttering, studiesituasjon og kompetanse, ei undersøking av rekruttering og kvalifisering i sosialt arbeid. Rapporten legg fram og analyserer funn frå prosjektet ”Barnevernspedagoger, sosionomer og vernepleiere: forskjeller i rekruttering, kunnskapsforståelse og kompetanse”.

Høgskulen i Volda er tildelt Erasmus Charter for perioden 2007-2013, melder internasjonal koordinator Cecilie Wilhelmsen. - Det betyr at Høgskulen kan ta del i alle aktivitetar i samanheng med Erasmusprogramma innanfor Life Long Learning Programme dei neste seks åra. Programmet inkluderer alt frå student- og lærarmobilitet innanfor Europa til praksismobilitet, forskarsamarbeid og ikkje minst, ulike joint-programmes eller felles gradar.

30.mai ble det arrangert en workshop i Trondheim som samlet høgskoler og forskningsinstitusjoner i Midt-Norge om tema innovasjon og nyskaping. Hensikten med workshopen var å sette fokus på samarbeidstiltak som på sikt skal øke antall bedriftsetableringer fra høgskole- og forskningsmiljøene i regionen.

Høgskulen i Volda har gjennom Forskingsrådet sitt program for strategiske høgskuleprosjekt fått seks millionar til forskingsprosjektet ”Kulturperspektiv på møte mellom bønder og embetsmenn”. - Vi er svært glade og ser på dette som ei stor utfordring, seier prosjektansvarleg Atle Døssland ved Historisk institutt.