Fordjupingsstudium i musikk inneheld fleire frittståande emne som studenten kan velje frå. Kvar for seg byggjer desse på Årsstudium i musikk ved Høgskulen i Volda. Studenten vil kunne utvikle haldningar, kunnskapar, ferdigheiter og handlingskompetanse i musikk, gjennom arbeid med fylgjande hovudområde: arrangering, instrumentaldidaktikk, musikkteknologi, komponering, utøving og formidling.

Studiet rettar seg inn mot utøvande og pedagogisk verksemd innanfor eit variert spekter av arbeidsplassar i samfunnet, t.d. grunnskulen/SFO, kulturskulen og andre samfunnsinstitusjonar, det frie kulturlivet og privat næring. Studiet gjev grunnlag for vidare studium i musikk og kan innpassast i bachelorgraden i musikk ved Høgskulen i Volda. Det kan også innpassast i andre bachelorgradar eller i ei faglærarutdanning, som gjev grunnlag for opptak i praktisk-pedagogisk utdanning (PPU). Gjennomført PPU gjev undervisningskompetanse for grunnskule og vidaregåande skule. Dei ulike emna i studiet kvalifiserer også for undervisning i kulturskulen.

Dersom studenten vil nytte fordjupingsstudiet til å få ein fri bachelorgrad i musikk, må MUS205 inngå som eitt av dei valte emna.