Samfunnsfag i grunnskulelærarutdanninga er eit profesjonsretta og forskings- og erfaringsbasert studium der teori og praksis verkar saman. Studiet kvalifiserer mellom anna til å planlegge, gjennomføre og kritisk analysere undervisning i samfunnsfaget, med utgangspunkt i refleksjon over elevar si læring. Barn og unge sin rett til opplæring i tråd med opplæringslova og gjeldande læreplanverk for 5. – 10. trinn er grunnlaget for studiet.

Samfunnsfag 2A er samansett av geografi, historie og samfunnskunnskap. Emnet inviterer særleg til å lære og å forstå meir om samspelet mellom menneske, mellom grupper og mellom samfunn. Emnet tek opp tema som politisk makt og politiske prosessar, demokrati, skule og media, pedagogisk entreprenørskap, norsk etterkrigstid, lokalisering av næringsverksemd og bruk av kart og digitale kartverktøy i skulen.  

Samfunnsvitskapleg omgrepsforståing blir utvikla ved å lære om teorigrunnlag for demokrati, ideologiar, makt og politiske system. Studentane skal skrive ei semesteroppgåve, og samband med dette møter dei undervisning i og litteratur om samfunnsvitskapleg metode.

Utforsking av ulike kjelder er tema for fagdidaktikk i historie, medan eit praktisk arbeidskrav knytt til bruk av digitale kart og kartverktøy i skulen, skal gjere studentane i stand til å ta i bruk slike verktøy, og kritisk vurdere denne bruken i geografiundervisninga. I samfunnskunnskap er det demokratiteori og demokratiundervisning som har ei særleg vinkling mot fagdidaktikk.

Ei semesteroppgåve med sjølvvald problemstilling dannar, saman med munnleg eksamen, grunnlaget for vurderinga i emnet. Dette kombinerer djupne og breidde i høve til læringsutbytte: Studentane får høve til fordjuping innan eit meir avgrensa tema, noko som både gir utvida ferdigheiter i akademisk skriving og ei førebuing til FoU-oppgåva i neste studieår. Munnleg eksamen bidreg til å vurdere breidda i læringsutbyttet.

Kunnskapar og ferdigheiter er resultat av teoretisk studiearbeid saman med refleksjon over eigen praksis. Eit godt læringsutbytte krev eigeninnsats gjennom sjølvstudium, deltaking i undervisning og praksis, samt diskusjon og refleksjon i gruppe eller plenum over relevante problemstillingar. Samfunnsfagstudiet legg til rette for profesjonslæring hos den enkelte. Studiet kvalifiserer også til å vidareutvikle samfunnsfaget og skulen som institusjon for læring og danning for demokrati i eit globalt samfunn.