Rettleiings- og mentorutdanning 2 - vidareutdanning
Målgruppa for studiet er førskule/barnehagelærarar og lærarar som skal vere rettleiarar for nyutdanna kollegaer og/eller praksislærarar i barnehage, skule og vidaregåande opplæring. Kvaliteten i grunnutdanningane si praksisopplæring skal styrkast mellom anna ved å gi alle praksislærarar tilbod om opplæring i rettleiing. Studiet rettar seg også mot rettleiing av kollegaer. Studiet har ei brei tilnærming til rettleiingsfeltet og legg vekt på utvikling av både kunnskapar om, og ferdigheiter i, rettleiing. Sentralt i studiet er styrking og utvikling av kommunikative ferdigheiter, relasjonskompetanse, refleksjon og analyse av eigen praksis som rettleiar. Innsikt i etiske dilemma og maktforhold i rettleiingssituasjonar er også sentralt i studiet. Vidare vert det lagt vekt på yrkesrolla i barnehage og skule, profesjonsidentitet og deltaking i profesjonelle læringsfellesskap. Studiet gir innsikt i nasjonal og internasjonal forsking om rettleiing.
I Nasjonale Retningsliner for grunnskulelærarutdanninga (KD, 2017) er det krav om at praksislærarar i grunnskulen skal ha gjennomført vidareutdanning i rettleiing på minimum 15 studiepoeng. Kravet om utdanning i rettleiing vil også gjelde praksislærarar i vidaregåande opplæring. I følgje Nasjonale retningsliner for barnehagelærarutdanning (KD, 2018) er det krav om 30 stp. rettleiing for å vere praksislærar i barnehagen. Stortinget har vedteke at alle nyutdanna lærarar og barnehagelærarar skal få tilbod om rettleiing, og utdanning av rettleiarar er eit av tiltaka for å sikre god rettleiing (KD 2018). Rettleiingsutdanninga er difor eit bidrag til å støtte begge desse tiltaka.
I tråd med det nasjonale kvalifikasjonsrammeverket har studenten følgjande læringsutbytte etter fullført studieprogram:
Studenten
- har innsikt i nasjonal og internasjonal forsking om rettleiing i barnehage og skule
- har innsikt i studentar, nyutdanna og nytilsette sine særlege vilkår og utfordringar i barnehage og skule
- har kunnskap om rettleiing som grunnlag for læring og kompetanseutvikling i barnehage og skule
- har innsikt i etiske utfordringar og maktforhold i rettleiing og i læraryrka
Studenten
- kan nytte forskingsbasert kunnskap om barnehage og skule i rettleiingssamanheng
- kan planlegge, gjennomføre og analysere rettleiing ut frå relevante faglege og teoretiske perspektiv
- meistrar å støtte og utfordre både studentar, nyutdanna og kollegaer gjennom fagleg og pedagogisk rettleiing
- kan kritisk vurdere eigen praksis i eit lærings- og danningsperspektiv
- meistrar å utøve etiske vurderingar i samband med rettleiingsarbeidet
- nyttar rettleiing som reiskap for kvalitetsutvikling i barnehage og skule
Studenten
- kan kritisk vurdere ulike rettleiingsteoretiske tilnærmingar i skule og barnehage
- har innsikt i relevante etiske problemstillingar knytte til rettleiingsfeltet
- kan støtte og utfordre både studentar, nyutdanna og kollegaer i deira læring og deltaking i kollektive læringsprosessar
- kan analysere og drøfte synspunkt og erfaringar med andre fagpersonar, og gjennom dette medverke til utvikling av god praksis
- har grunnleggande forståing for korleis rettleiing kan bidra til utvikling av eigen kompetanse og til organisasjonsutvikling
Studiet er samlingsbasert. Det er obligatorisk frammøte til alle samlingar (Minimum 75% oppmøte).
| Course | 2024 Autumn | 2025 Spring |
|---|---|---|
| 7.5 | 7.5 | |
| Sum (15 total) | 7.5 | 7.5 |